ئه‌مڕۆ به‌ڕێز دادوه‌ر عه‌لی عه‌ولا جێگری سه‌رۆكی ئه‌نجومه‌نی دادوه‌ری پێشوازی له‌ به‌ڕێز دادوه‌ی سالار عه‌بدولستار وه‌زیری دادی حكومه‌تی عێراقی فیدرال و د. دیندار زێباری رێكخه‌ری راسپارده نێوده‌وڵه‌تیه‌كان و‌ شاندێكی یاوه‌ری كرد.

له‌ دانیشتنێكدا كه‌ به‌ڕێزان دادوه‌ر عه‌بدوللا شه‌ره‌فانی جێگری سه‌رۆكی ئه‌نجومه‌نی دادوه‌ری و دادوه‌ر برایم خۆشناو سه‌رۆكی دادگای تێهه‌لچوونه‌وه‌ی ناوچه‌ی هه‌ولێر و یاسین حه‌مه‌د عه‌لی مه‌لا مسته‌فا راوێژكاری ئه‌نجومه‌نی دادوه‌ری هه‌رێم ئاماده‌ی بوون، گفتوگۆ له‌سه‌ر هه‌ماهه‌نگی و كاری هاوبه‌ش له‌نێوانیان كرا به‌ تایبه‌ت بواره‌كانی یاسایی و دادوه‌ری و مافی مرۆڤ.

به‌ڕێز جێگرانی سه‌رۆكی ئه‌نجومه‌نی دادوه‌ری وێڕای به‌خێرهێنانی وه‌زیری دادی حكومه‌تی فیدرالی خۆشحاڵی خۆیان به‌و سه‌ردانه‌ ده‌ربڕی و دووپاتیان له‌سه‌ر به‌رده‌وامی هه‌ماهه‌نگی له‌و بوارانه‌ كرده‌وه‌ كه‌ په‌یوه‌ندیدارن به‌ چه‌سپاندنی دادپه‌روه‌ری و یاساسه‌روه‌ری و پاراستنی مافه‌كانی مرۆڤ. له‌لایه‌ن خۆیه‌وه‌ وه‌زیری دادی حكومه‌تی فیدرالیش وێڕای خۆشحاڵی به‌و سه‌ردانه‌ گوتی به‌رێگه‌ی لیژنه‌ی راسپارده‌ نێوده‌وڵه‌تیه‌كان قۆناغی باشیان بڕیوه‌ بۆ كارو هه‌ماهه‌نگی هاوبه‌ش له‌نێوان هه‌رێم و حكومه‌تی فیدرالی و داواكاریش بوو ئه‌و كاره‌ هاوبه‌شانه‌ په‌ره‌ی زیاتریان پێ بدرێت.