سه‌رۆكی ئه‌نجومه‌نی دادوه‌ری پێشوازی له‌ شاندێكی UNDP كرد

له‌ دانیشتنێكدا شاندی مێوان ئامانجی سه‌ردانه‌كه‌یان خسته‌ڕوو كه‌ ئه‌ویش جێبه‌جێ كردنی پرۆژه‌یه‌كه‌ بۆ پاڵپشتی كردنی تواناكانی دادوه‌ری و یاسایی له‌ بواری لێكۆڵینه‌وه‌ له‌ تاوانه‌كانی تایبه‌ت به‌ دارایی و مالی و له‌و باره‌یه‌وه‌ شاندی مێوان خۆشحاڵی خۆی به‌ هاوكاری و هه‌ماهه‌نگی له‌گه‌ڵ ئه‌نجومه‌نی دادوه‌ری هه‌رێمی كوردستان ده‌ربڕی. شاندی UNDP رایگه‌یاند له‌ به‌رنامه‌یاندا هه‌یه‌ وركشۆپێكی تایبه‌ت به‌ به‌رزكردنه‌وه‌ی ئاستی توانا و شاره‌زایی بۆ لێكۆڵینه‌وه‌ له‌ تاوانه‌كانی تایبه‌ت به‌ دارایی و سپیكردنه‌وه‌ی پاره‌و گه‌نده‌ڵی دارایی رێك بخه‌ن. بۆ ئه‌م مه‌به‌سته‌ش ئه‌نجومه‌نه‌كانی دادوه‌ری فیدرالی و هه‌رێم و هه‌روه‌ها ده‌سته‌كانی ده‌ستپاكی له‌ به‌غداو هه‌رێم و هه‌ردوو وه‌زاره‌ته‌كانی ناوخۆی فیدرالی و هه‌رێم به‌شدار ده‌بن له‌و وركشۆپه‌ی كه‌ تیمی UNDP رێكی ده‌خات.

سه‌رۆكی ئه‌نجومه‌نی دادوه‌ری وێڕای به‌خێرهێنانی شاندی UNDP، پرۆژه‌ی شانده‌كه‌ی به‌ پرۆژه‌یه‌كی گرنگ وه‌سف كرد و له‌وڕووه‌وه‌ هه‌موو هاوكاری و هه‌ماهه‌نگیه‌كی بۆ سه‌رخستنی پرۆژه‌كه‌ دووپات كرده‌وه. هه‌روه‌ها سه‌رۆكی ئه‌نجومه‌نی دادوه‌ری گوتیشی وه‌ك ئه‌نجومه‌نی دادوه‌ری هه‌رێم بۆ پێشكه‌وتنی بواری دادپه‌روه‌ری و یاسایی و دادوه‌ری ئاماده‌یی هه‌موو هاوكارییه‌كن و داواشی كرد كه‌ شاندی UNDP په‌ره‌ی زیاتر به‌و جۆره‌ چالاكیانه‌ بدات و چه‌شنی به‌غدا، له‌ هه‌رێمی كوردستانیش ئه‌و جۆره‌ پرۆژانه‌ رێك بخات.