ئه‌مڕۆ به‌ڕێز دادوه‌ر عبدالجبار عزیز حسن سه‌رۆكی ئه‌نجومه‌نی دادوه‌ری پێشوازی كرد له‌ شاندێكی خاچی سووری نێوده‌وڵه‌تی.

له‌ دانیشتنێكدا گفتوگۆ له‌باره‌ی میكانیزمه‌كانی هه‌ماهه‌نگی و هاوكاری نێوان هه‌رێمی كوردستان و حكومه‌تی فیدرالی له‌سه‌ر ژماره‌یه‌ك پرسی یاسایی و دادوه‌ری كرا وه‌ك كاروباری دادگاكان و ره‌وشی گرتووخانه‌كان و ئاڵوگۆڕی به‌ندكراو و حوكمدراوان له‌نێوان هه‌ردوولا.

له‌وباره‌یه‌وه‌ به‌ڕیز سه‌رۆكی ئه‌نجومه‌نی دادوه‌ری وه‌ڵامی پرسیار و تێبینیه‌كانی شاندی خاچی سووری دایه‌وه‌و رایگه‌یاند كه‌ هه‌ماهه‌نگی و هاوكارییه‌كی باش له‌نێوان حكومه‌تی فیدرالی و هه‌رێمی كوردستاندا هه‌یه‌ ئه‌ویش له‌سه‌ر بنه‌مای ده‌ستوری و یاسایی و بۆ ئه‌م مه‌به‌سته‌ش لیژنه‌یه‌كی تایبه‌ت له‌نێوان هه‌ردوولادا هه‌یه‌ بۆ به‌دواداچوون له‌و بابه‌تانه‌ی كه‌ له‌سه‌ره‌وه‌ ئاماژه‌ پێدراون. هه‌روه‌ها سه‌رۆكی ئه‌نجومه‌نی دادوه‌ری ئاماده‌یی خۆی بۆ هه‌موو هه‌ماهه‌نگی و هاوكارییه‌كی ئه‌نجومه‌نی دادوه‌ری هه‌رێم بۆ رێكخراوی خاچی سووری نێوده‌وڵه‌تی سه‌باره‌ت به‌و بابه‌ته‌ په‌یوه‌ندیدارانه‌ی كه‌ به‌دواداچوونیان بۆ ده‌كه‌ن ده‌ربڕێ.