ئه‌مڕۆ به‌ڕێز دادوه‌ر عه‌بدولجه‌بار عه‌زیز حه‌سه‌ن سه‌رۆكی ئه‌نجومه‌نی دادوه‌ری هه‌رێمی كوردستان سه‌ردانی دادگای به‌رایی عه‌ینكاوه‌ی له‌ هه‌ولێر كرد.

دوای پێشوازی كردن له‌لایه‌ن دادوه‌ران و ئه‌ندامانی داواكاری گشتی دادگاكه‌، سه‌رۆكی ئه‌نجومه‌نی دادوه‌ری ئامانجی سه‌ردانه‌كه‌ی خسته‌ڕوو كه ئاگاداربوونه‌ له‌ چۆنیه‌تی به‌ڕێوه‌چوونی كاروباری دادگاو‌ به‌داواداچوون و بۆ كێشه‌و كه‌موكۆڕییه‌كانی دادگاكه‌‌. سه‌رۆكی دادگای به‌رایی عه‌ینكاوه‌ پوخته‌یه‌كی له‌سه‌ر كارو ئه‌ركه‌كانی رۆژانه‌ی دادگاكه‌ خسته‌ڕوو و ئاماژه‌ی به‌وه‌ش دا كه‌ به‌هۆی زۆربوونی رێژه‌ی دانیشتوانی شارۆچكه‌ی عه‌ینكاوه‌ و ده‌وروبه‌ری، قورسایی گه‌وره‌ی خستۆته‌ سه‌ر كاروباری رۆژانه‌ی دادگا و له‌م ڕووه‌وه‌ پێویستیان به‌ زیادكردنی ژماره‌ی دادوه‌ر و ئه‌ندامی داواكاری گشتی و لێكۆڵه‌ره‌وه‌ی دادوه‌ری و هه‌روه‌ها بیناكردنی باڵه‌خانه‌یه‌كی نوێ هه‌یه‌.

 

به‌ڕێز دادوه‌ر عه‌بدولجه‌بار عه‌زیز حه‌سه‌ن وێڕای سوپاسی كردنی دادوه‌ران و ئه‌ندامانی داواكاری گشتی و فه‌رمانبه‌رانی دادگاكه‌ ، گوتی كه‌ پێویسته دادگاو یاسا له‌ خزمه‌ت هاووڵاتیاندا بن و زۆرترین خزمه‌ت به‌ هاووڵاتیان بگه‌یه‌نن و كاره‌كانیان به‌ رێكوپێكی رایی بكرێن، كه‌ ئه‌مه‌ش له‌ كۆتاییدا له‌ خزمه‌ت پێشخستنی دادگاكان و سه‌روه‌ریی یاسایه‌ له‌ هه‌رێمی كوردستاندا.

 دواتر سه‌رۆكی ئه‌نجومه‌نی دادوه‌ری هاوڕێ له‌گه‌ڵ به‌ڕیز یاسین حه‌مه‌دعه‌لی راوێژكاری ئه‌نجومه‌نی دادوه‌ری و به‌ڕێوه‌به‌ری گشتی ئه‌نجومه‌ن به‌شه‌كانی باڵه‌خانه‌ی دادگای به‌رایی عه‌ینكاوه‌ی به‌سه‌ر كرده‌وه‌. سه‌رۆكی ئه‌نجومه‌نی دادوه‌ری رایگه‌یاند مه‌به‌ست له‌و سه‌ردانه‌ بۆ له‌نزیكه‌وه‌ ئاگاداربوون له‌ ئه‌رك و كاره‌كانی دادگا و چۆنیه‌تی راییكردنی كاروباری هاووڵاتیان و هه‌روه‌ها چاره‌سه‌ركردنی كێشه‌و كه‌موكۆڕییه‌كانی دادگاكه‌یه‌ به‌ڵێنیشی دا به‌ هه‌موو توانایه‌ك هه‌وڵ بدرێت ئه‌و كه‌موكۆڕییانه‌ی كه‌ له‌چوارچێوه‌ی كاروباری رۆژانه‌ی هاووڵاتیان و هه‌روه‌ها تایبه‌ت به‌ باڵه‌خانه‌و پێداویستیه‌كانی دادگای به‌رایی عه‌ینكاوه‌ هه‌ن، چاره‌سه‌ر بكرێن.