ئه‌مڕۆ به‌ڕێز دادوه‌ر عبدالجبار عزیز حسن سه‌رۆكی ئه‌نجومه‌نی دادوه‌ری هه‌رێمی كوردستان سه‌ردانی هه‌ریه‌ك له‌ دادگاكانی به‌رایی قوشته‌په‌و ده‌شتی هه‌ولێری كرد.

له‌ سه‌ردانی یه‌كه‌میدا بۆ دادگای به‌رایی قوشته‌په‌، دوای پێشوازی و به‌خێرهێنانی له‌لایه‌ن دادوه‌ر و ئه‌ندامانی داواكاری گشتی و ئیداره‌ی دادگاكه‌، سه‌رۆكی ئه‌نجومه‌نی دادوه‌ری گوتی ئامانج له‌و سه‌ردانه‌ بۆ ئاگاداربوون له‌ چۆنیه‌تی به‌ڕێوه‌چوونی كاروباری دادگاو هاووڵاتیان و پێداویستی و كه‌موكۆڕییه‌كانه‌. سه‌رۆكی ئه‌نجومه‌نی دادوه‌ری رایگه‌یاند پێویسته‌ خزمه‌تكردنی هاووڵاتیان و پاراستنی ماف و داواكارییه‌كانیان له‌ چوارچێوه‌ی یاسایی خۆیدا، ته‌وه‌ری سه‌ره‌كی ئه‌رك و به‌رپرسیارێتیه‌كان بێت به‌ تایبه‌ت له‌ دادگاكان كه‌ شوێنی پاراستنی ماف و داواكاریی هاووڵاتیانه‌. دواتر سه‌رۆكی ئه‌نجومه‌نی دادوه‌ری گوێی له‌ دادوه‌ر و ئه‌ندامانی داواكاری گشتی و ئیداره‌ی دادگاكه‌ گرت و له‌ شێوازی به‌ڕیوه‌چوونی كاروباری دادگا چ له‌ڕووی یاسایی و چ له‌ڕووی ئیداریی كۆڵیه‌وه‌. هه‌ر له‌و چوارچێوه‌یه‌دا سه‌رۆكی ئه‌نجومه‌نی دادوه‌ری سه‌ردانی ژوور و به‌شه‌كانی دادگای كرد‌و له‌نزیكه‌وه‌ گوێی له‌ فه‌رمانبه‌ران و داواكارییه‌كانیان گرت. لێكۆڵه‌ر و فه‌رمانبه‌رانی دادگا وێڕای باسكردنی به‌ڕێوه‌چوونی كاروباری رۆژانه‌، ژماره‌یه‌ك داواكارییان خسته‌ڕوو وه‌ك نه‌بوونی ژماره‌یه‌كی پێویستی لێكۆڵه‌ره‌وه‌ی دادوه‌ری و فه‌رمانبه‌ری یاسایی و هه‌روه‌ها باڵه‌خانه‌ و شوێنی گونجاو بۆ دادگاكه‌ و ژماره‌یه‌ك پیداویستی دیكه‌ی رۆژانه‌ كه‌ سه‌رۆكی ئه‌نجومه‌نی دادوه‌ری به‌ڵێنی دا به‌ پێی توانا و له‌ داهاتوویه‌كی نزیكدا چاره‌سه‌ر بكرێن.

دواتر سه‌رۆكی ئه‌نجومه‌نی دادوه‌ری سه‌ردانی دادگای به‌رایی ده‌شتی هه‌ولێری كرد و له‌لایه‌ن دادوه‌ر و ئه‌ندامانی داواكاری گشتی و ئیداره‌ی دادگا پێشوازی كرا. له‌ دانیشتنێكدا سه‌رۆكی ئه‌نجومه‌نی دادوه‌ری ئه‌وه‌ی دووپات كرده‌وه‌ كه‌ پێویسته‌ راییكردنی داوا و مامه‌ڵه‌ی هاووڵاتیان له‌ چوارچێوه‌ یاساییه‌كه‌ی خۆیدا ئه‌نجام بدرێن و دادپه‌روه‌ری و پاراستنی ماف و به‌رژه‌وه‌ندی هاووڵاتیان خاڵی یه‌كه‌می ئه‌رك و به‌رپرسیارێتیه‌كان بێت. دواتر سه‌رۆكی ئه‌نجومه‌نی دادوه‌ری یه‌كه‌یه‌كه‌ی ژوور و به‌شه‌كانی دادگای به‌رایی ده‌شتی هه‌ولێری به‌سه‌ر كرده‌وه‌و له‌نزیكه‌وه‌ ئاگاداری شێوازی به‌ڕێوه‌چوونی كاره‌كان و هه‌روه‌ها پێداویستی و كه‌موكۆڕییه‌كانی دادگاكه‌ بوو. له‌و رووه‌وه‌ش سه‌رۆكی ئه‌نجومه‌نی دادوه‌ری رایگه‌یاند ئامانجی ئه‌و سه‌ردانانه‌ بۆ باشتر به‌ڕێوه‌چوونی كاروباری هاووڵاتیان و جێبه‌جێ كردنی داواكارییه‌ پێویسته‌كان و كه‌موكۆرییه‌كانی دادگاكانه‌ بۆیه‌ به‌ هه‌موو توانا هه‌وڵ ده‌درێت له‌ كاتێكی نزیكدا ئه‌و داواكارییانه‌ جێبه‌جێ بكرێن.