ئه‌مڕۆ به‌ڕێز دادوه‌ر عبدالجبار عزیز حسن سه‌رۆكی ئه‌نجومه‌نی دادوه‌ری هه‌رێمی كوردستان پێشوازی كرد له‌ شاندێكی به‌ریتانی به‌ سه‌رۆكایه‌تی لوسی ئالدوز به‌رپرسی دژه‌تیرۆری ناوچه‌ی كه‌نداوو عێراق و شام له‌ وه‌زاره‌تی ده‌ره‌وه‌ی به‌ریتانیا.

له‌ دانیشتنێكدا شاندی میوان سوپاسی سه‌رۆكی ئه‌نجومه‌نی دادوه‌رییان كرد بۆ ئه‌و پێشوازییه‌ و سه‌ردانی ئه‌م دواییه‌ی سه‌رۆكی ئه‌نجومه‌نی دادوه‌ری و شاندی یاوه‌ری بۆ به‌ریتانیایان به‌ هه‌نگاوێكی گرنگ بۆ په‌ره‌پێدانی په‌یوه‌ندییه‌كانی نێوان هه‌ردوولا ناوبرد. هه‌روه‌ها ئاماده‌یی وڵاته‌كه‌یان بۆ به‌رده‌وامیدان به‌و هه‌ماهه‌نگیه‌و هاوكاری زیاتری هه‌رێمی كوردستان له مه‌شق و راهێنان و‌ به‌هێزكردنی تواناكان له‌ بواره‌ جیاجیاكان به‌ تایبه‌ت شه‌ڕی دژی تیرۆر و رووبه‌ڕوبوونه‌وه‌ی گه‌نده‌ڵی دووپات كرده‌وه‌.

لای خۆیه‌وه‌ سه‌رۆكی ئه‌نجومه‌نی دادوه‌ری وێڕای به‌خێرهێنانی شاندی به‌ریتانی، رایگه‌یاند به‌ریتانیا و هه‌رێمی كوردستان له‌ زۆر بواردا هاوبه‌شی سه‌ره‌كی یه‌كترن به‌ تایبه‌ت له‌ شه‌ڕی دژی تیرۆر. هه‌روه‌ها گوتیشی شه‌ڕی دژی تیرۆر سنوری نیه ‌و رووبه‌ڕووبوونه‌وه‌ی تیرۆریش هاوكارییه‌كی هه‌مه‌لایه‌نه‌ی نێوخۆیی و نێوده‌وڵه‌تی گه‌ڕه‌كه‌، بۆیه‌ هه‌رێمی كوردستان خۆشحاڵه‌ كه‌ هاوبه‌شێكی سه‌ره‌كیه‌ له‌ به‌ره‌ی جیهانی شه‌ڕی دژی تیرۆر و به‌رده‌وامیش ئاماده‌یه‌ بۆ هاوكاریی و هه‌ماهه‌نگی زیاتر له‌و بواره‌.‌ هه‌روه‌ها به‌ڕێز سه‌رۆكی ئه‌نجومه‌نی دادوه‌ری سه‌ردانی ئه‌م دواییه‌ی بۆ به‌ریتانیا به‌ گرنگ و به‌سوود وه‌سف كرد بۆ له‌نزیكه‌وه‌ ئاگاداربوون له كاروباری‌ ده‌سه‌ڵاتی دادوه‌ری به‌ریتانیاو سودوه‌رگرتن له‌ ئه‌زمونی ئه‌و وڵاته له‌ بواری دادپه‌روه‌ریی و یاسایی. راشیگه‌یاند هه‌رێمی كوردستان سوودی زۆری له‌و نزیكی و په‌یوه‌ندییانه‌ له‌گه‌ڵ به‌ریتانیا وه‌رگرتووه‌و هیواخوازیشه‌ ئه‌و جۆره‌ په‌یوه‌ندیی و هه‌ماهه‌نگیانه‌ به‌رده‌وام بێت به‌تایبه‌ت مه‌شق و راهێنان و به‌هێزكردنی تواناكان له‌ بواره‌كانی تاوانه‌كانی تیرۆر و سپیكردنه‌وه‌ی پاره‌و رووبه‌ڕووبوونه‌وه‌ی گه‌نده‌ڵی. له‌م رووه‌شه‌وه‌ ئاماده‌ی هه‌موو جۆره‌ هاوكاریی و هه‌ماهه‌نگیه‌كه‌ له‌گه‌ڵ كۆنسوڵخانه‌ی به‌ریتانیا له‌ هه‌رێمی كوردستان و له‌و چوارچێوه‌یه‌شدا هه‌ردوولا به‌ڵینیان دا په‌ره‌ی زیاتر به‌ په‌یوه‌ندییه‌كانی نێوانیان بدرێت.