ئەمڕۆ 1/11/2023 بەڕێز دادوەر عبدالجبار عزیز حسن سەرۆکی ئەنجومەنی دادوەریی هەرێمی کوردستان سەردانی دادگای تێهەلچوونەوەی ناوچەی کەرکوک/گەرمیان و هەریەک لە دادگاکانی بەرایی کەلارو کفری و رزگاری و قۆرەتوو و دەربەندیخانی کرد.
لە یەکەم وێستگەی سەردانەکەیدا بۆ گەرمیان، سەرۆکی ئەنجومەنی دادوەریی گەیشتە سەرۆکایەتی دادگای تێهەلچوونەوەی کەرکوک/گەرمیان و لەلایەن بەڕێز دادوەر د. ئاوات عومەر قادر سەرۆکی دادگای
تێهەلچوونەوەی کەرکوک/گەرمیان و دادوەر و ئەندامانی داواکاریی گشتی و بەڕێوەبەرو فەرمانبەرانی دادگاکە پێشوازیی کرا.
سەرۆکی ئەنجومەنی دادوەریی هەرێم لە دانیشتنێکدا رایگەیاند بۆ ئاگاداربوون و بەدواداچوون له چۆنیەتی بەڕێوەچوونی کاروباری دادگاکان هاتووە، بۆ لەنزیکەوە گوێگرتن لە داواکاریی و کێشەو گرفتی دادگاکان. دادوەر عبدالجبار عزیز حسن لە کۆبوونەوەکەدا تەئکیدی کردەوە کە گرنگترین ئەولەویەتی کاری دادگاکان جێبەجێکردن و چەسپاندنی یاساو بەدیهێنانی دادپەروەرییە کە هەر ئەمەشە متمانەی هاووڵاتیان گەرەنتی دەکات، بۆیە پێویستە کاری هەرە پێشەوەی دادوەرو ئەندامی داواکاری گشتی و فەرمانبەرانی دادگا سەرخستنی یاساسەروەریی و دادپەوەریی بێت. هەروەها سەرۆکی ئەنجومەنی دادوەریی سوپاسی دادوەران و تەواوی فەرمانبەرانی دادگاکانی ناوچەی کەرکوک/ گەرمیانی کرد کە سەرەڕای ئیمکانیاتێکی کەم و کەموکۆڕیی جیاجیا بەڵام بە دڵسۆزیی و ئەمانەتەوە ئەرک و بەرپرسیارێتیەکانیان جێبەجێ کردووە، کە ئەمەش جێگەی شانازیی و دڵخۆشییە.
دواتر سەرۆکی دادگای تێهەلچوونەوەی کەرکوک/گەرمیان دادوەر د. ئاوات عومەر قادر وێڕای بەخێرهێنانی سەرۆکی ئەنجومەنی دادوەریی و شاندی هاوڕێی، سەردانەکەی به هەنگاوێکی گرنگ و هاندەر بۆ بەردەوامیدان و باشتر راپەڕاندنی کاروباری دادگاکەیان ناوبرد. دواتر لە دانیشتنەکەدا دەرگای گفتوگۆیەکی کراوەو راشکاوانە کرایەوەو دادوەرو ئامادەبوانی دادگا داواکاریی و کێشەو گرفتەکانی بەردەمیان بۆ سەرۆکی ئەنجومەنی دادوەریی خستەڕوو. سەرەکیترین کێشەو گرفتەکانیش نەبوونی باڵەخانەی گونجاوو میلاکی فەرمانبەران و کەمیی ژمارەی لێکۆڵەری دادوەریی و هەروەها پێداویستی و کەلوپەلی ناو دادگاکان بوو کە سەرۆکی ئەنجومەنی دادوەریی بەڵێنی دا بە پێی تواناو ئیمکانیاتی بەردەست کێشەکان چارەسەر بکات. دواتر سەرۆکی ئەنجومەنی دادوەریی هاوڕێ لەگەڵ سەرۆکی دادگای تێهەلچوونەوەی کەرکوک/گەرمیان سەردانی دادگاکانی بەرایی خانەقین لە قۆرەتوو و دادگای بەرایی کفری و کەلار و رزگاریی و دەربەندیخانی کرد. لەو سەردانانەشدا، سەرۆکی ئەنجومەنی دادوەریی لە نزیکەوە بەدواداچوونی بۆ رەوتی بەڕێوەچوونی داوا جیاجیاکانی ئەو دادگایانەو کێشەو گرفتەکانی بەردەم ئەو پرۆسەیە کردو لە کێشەو گرفتەکانیان کوڵیەوەو رایگەیاند ئەنجومەنی دادوەریی بەردەوام هەوڵ دەدات بۆ چارەسەرکردنی کۆسپ و ئاستەنگەکانی بەردەم دادگاکان و بەپێی ئەولەویەت و گرنگیی کاروبارەکانیان، ئەو کێشەو گرفتانە چارەسەر دەکات.