ئه‌مڕۆ 30/4/2024 به‌ڕێز دادوه‌ر عبدالجبار عزیز حسن سه‌رۆكی ئه‌نجومه‌نی دادوه‌ریی هه‌رێمی كوردستان پێشوازی كرد له ئه‌ندرۆ ماهونی سه‌رۆكی تیمی (پرۆژه‌ی به‌ره‌نگاربوونه‌وه‌ی سپیكردنه‌وه‌ی پاره‌‌)ی‌ سه‌ر به‌ UNDP  له‌ عێراق و شاندی یاوه‌ری.

له‌ دانیشتنێكدا كه‌ به‌ڕێز دادوه‌ر دارا محمد ابراهیم ئه‌ندامی دادگای پێداچوونه‌وه‌ی هه‌رێمی كوردستانیش به‌شدار بوو، گفتوگۆ له‌باره‌ی تاوانی سپیكردنه‌وه‌ی پاره‌و پاره‌داركردنی تیرۆر و رێكارو میكانیزمه‌كانی به‌ره‌نگاربوونه‌وه‌ی ئه‌و تاوانه‌ و میكانیزمه‌كانی كارپێكردنی یاسای ژماره‌ 39ی ساڵی 2015ی تایبه‌ت به‌ به‌ره‌نگاربوونه‌وه‌ی سپیكردنه‌وه‌ی پاره‌ له‌ عێراق و هه‌رێمی كوردستان و هه‌مواره‌ پێویسته‌كانی سه‌ر ئه‌و یاسایه‌ كرا.

سه‌رۆكی ئه‌نجومه‌نی دادوه‌ریی پاڵپشتی ئه‌نجومه‌ن و دادگاكانی هه‌رێمی كوردستان بۆ هاوكاری و هه‌ماهه‌نگی له‌گه‌ڵ تیمی ناوبراو دووپات كرده‌وه‌و رایگه‌یاند شاره‌زایی و پسپۆڕیی ئه‌وان سوودبه‌خشه‌ بۆ ئه‌نجومه‌نی دادوه‌ریی و دادگاكانی هه‌رێمی كوردستان. هه‌روه‌ها سوپاسیشی كردن بۆ كردنه‌وه‌ی خوله‌كانی مه‌شق و راهێنان بۆ به‌هێزكردنی توانای دادوه‌ران له‌ به‌ره‌نگاربوونه‌وه‌ی تاوانی پاره‌داركردنی تیرۆر و سپیكردنه‌وه‌ی پاره‌.

لای خۆیه‌وه‌، سه‌رۆكی تیمی (پرۆژه‌ی به‌ره‌نگاربوونه‌وه‌ی سپیكردنه‌وه‌ی پاره‌) وێڕای ستایشی سه‌رۆكی ئه‌نجومه‌نی دادوه‌ریی بۆ هاوكاری و هه‌ماهه‌نگی به‌رده‌وامییان له‌گه‌ڵ تیمی ناوبراو، دووپاتی كرده‌وه‌ به‌رده‌وام ده‌بن له‌و هه‌ماهه‌نگیه‌و له‌ په‌یوه‌ندی به‌رده‌وامیشدا ده‌بن بۆ  به‌ده‌ستهێنانی ده‌ره‌نجامی باش له‌چوارچێوه‌ی ستاندارده‌ جیهانیه‌كان بۆ به‌ره‌نگاربوونه‌وه‌ی تاوانی پاره‌داركردنی تیرۆر و سپیكردنه‌وه‌ی پاره‌.