ئه‌مڕۆ 6/10/2024 به‌ڕێز دادوه‌ر محه‌مه‌د مسته‌فا مه‌حمود جێگری سه‌رۆكی ئه‌نجومه‌نی دادوه‌ری هه‌رێمی كوردستان پێشوازی كرد له‌ شاندێكی كۆنسوڵخانه‌ی ئه‌مریكا له‌ هه‌رێمی كوردستان.

له‌ دانیشتنێكدا گفتوگۆ له‌سه‌ر كاروباری دادگاكان له‌ هه‌رێمی كوردستان و به‌هێزكردنی هه‌ماهه‌نگی و هاوكاری نێوان هه‌ردوولا له‌ بواره‌ یاساییه‌كان كرا. جێگری سه‌رۆكی ئه‌نجومه‌نی دادوه‌ری وێڕای خستنه‌ڕووی كورته‌یه‌ك له‌سه‌ر كارو ئه‌زمونی ئه‌نجومه‌نی دادوه‌ریی و دادگاكان له‌ هه‌رێمی كوردستان ئاماژه‌ی به‌وه‌ دا كه‌ ده‌سه‌ڵاتی دادوه‌ریی له‌ هه‌رێمی كوردستان وه‌ك ده‌سه‌ڵاتێكی سه‌ربه‌خۆ به‌ هه‌ماهه‌نگی له‌گه‌ڵ ده‌سه‌ڵاته‌كانی دیكه‌ كار ده‌كات بۆ چه‌سپاندنی یاسا و سه‌روه‌ریی یاسا له‌ هه‌رێمی كوردستان.

لای خۆیانه‌وه‌ شاندی كۆنسوڵخانه‌ی ئه‌مریكا ئاماده‌یی خۆیان بۆ هاوكاری و هه‌ماهه‌نگی له‌گه‌ڵ ئه‌نجومه‌نی دادوه‌ریی ده‌ربڕی به‌ تایبه‌ت له‌ چوارچێوه‌ی كردنه‌وه‌ی خولی به‌هێزكردنی تواناكان له‌ بواری یاسایی و دادوه‌ریی بۆ دادوه‌ران و ئه‌ندامانی داواكاری گشتی و لێكۆڵه‌رانی دادوه‌ری.

جێگری سه‌رۆكی ئه‌نجومه‌نی دادوه‌ری خۆشحاڵی خۆی بۆ هه‌ر هاوكاریی و هه‌ماهه‌نگیه‌ك‌ ده‌ربڕی و رایگه‌یاند ئه‌وان به‌ سوپاسه‌وه‌ پێشوازی له‌ هه‌ر هه‌وڵ و هه‌نگاوێك ده‌كه‌ن كه‌ بۆ به‌هێزتركردن و به‌ره‌وپێشبردنی ره‌وتی یاسایی و سه‌روه‌ریی یاسا بێت له‌ هه‌رێمی كوردستان.