|
|
سه‌رۆكی ئه‌نجومه‌نی دادوه‌ری پێشوازی كرد له جێگری وه‌زیری دادو باڵیۆزی نه‌رویج له عێراق و شاندی یاوه‌ریان
06/02/2013
1386
جار خوێندراوه‌ته‌وه
به‌ڕێز ئه‌حمه‌د عه‌بدوللا زوبێر سه‌رۆكی ئه‌نجومه‌نی دادوه‌ری هه‌رێمی كوردستان پێشوازی كرد له (پال لونست) جێگری وه‌زیری دادی نه‌رویج و هه‌روه‌ها (پیته‌ر ئولبێرگ) باڵیوزی ئه‌و وڵاته له عێراق و كونسولی نه‌رویج و شاندێكی هاوڕێیان.
سه‌رۆكی ئه‌نجومه‌نی دادوه‌ری به‌گه‌رمی به‌خێرهاتنی شاندی مێوان كرد و تیشكی خسته سه‌ر ئه‌رك و ده‌سه‌ڵاته‌كانی ئه‌نجومه‌نی دادوه‌ری و ته‌واوی دادگاكانی سه‌ر به ئه‌نجومه‌نی دادوه‌ری و هه‌روه‌ها رێره‌وی یاسایی كارپێكراو له ئه‌نجومه‌نی دادوه‌ری و دادگاكانی هه‌رێمی كوردستان.
له‌و چوارچێوه‌یه‌دا، باس له ژماره‌یه‌ك بابه‌تی په‌یوه‌ندیدار به بواری یاسا و دادگاكان و چۆنیه‌تی ده‌ركردنی بڕیاره‌كان كرا، وه‌ك بابه‌تی سزای له‌سێداره‌دان و هه‌روه‌ها یاسای تیرۆر و چۆنیه‌تی كارپێكردنی یاسای تیرۆر و هه‌روه‌ها گه‌ره‌نتیه‌كانی دادگاییكردنێكی دادپه‌روه‌رانه ده‌رهه‌ق به تۆمه‌تبار له هه‌رێمی كوردستان و عێراق.
له‌لایه‌ن خۆیه‌وه، جێگری وه‌زیری دادی حكومه‌تی نه‌رویج، رایگه‌یاند كه سه‌ردانی ئه‌وان به مه‌به‌ستی ئاگاداربوونه له بواری دادوه‌ریی و چۆنیه‌تی به‌ڕێوه‌چوونی كارو ده‌سه‌ڵاتی دادگاكان له عێراق و هه‌رێمی كوردستان و هه‌روه‌ها هه‌مانگی نێوان هه‌ردوو ده‌سه‌لاتی دادوه‌ری له به‌غداو هه‌رێمی كوردستان.
به‌ڕێز ئه‌حمه‌د عه‌بدوللا زوبێر، سه‌ره‌ڕای ده‌ربڕینی خۆشحاڵی خۆی به گرنگیدانی به‌رپرسانی وه‌زاره‌تی دادی نه‌رویج به‌و بواره، هیوای خواست، په‌یوه‌ندی و هاوكاریی و هه‌ماهه‌نگی نێوان نه‌رویج و هه‌رێمی كوردستان و عێراق پته‌وتر بكرێت ئه‌ویش به رێگه‌ی سوود وه‌رگرتن له ئه‌زمونی ئه‌و وڵاته له بواری یاسایی و سه‌رخستنی ئه‌و بواره وه‌ك گه‌ره‌نتیه‌ك بۆ پاراستنی مافه‌كانی مرۆڤ.
|
|